නිලානීගෙන් රිදී පදක්කමක්, ප්‍රසාද් විමලසිරිට ලෝකඩ පදක්කම
ආසියානු ක්‍රීඩා උළෙලට සූදානමක් ලෙස ඉන්දුනීසියාවේදී පැවැත්වෙන ආරාධිත ක්‍රීඩා උළෙලේ මලල ක්‍රීඩා තරගාවලියේ දී ශ්‍රී ලංකා ක්‍රීඩක ක්‍රිඩිකාවන් මේවනවිට පදක්කම් 9 ක් දිනා ගැනීමට සමත්ව සිටීයි.
අද පැවති මීටර් 1500 කාන්තා ඉසව්වට සහභාගී වූ නිලානී රත්නායක, පුද්ගලික හොඳම දක්ෂතාව ලෙස තත්පර 4:19.25 ක දක්ෂතාවක් දක්වමින් රිදී පදක්කම හිමිකරගෙන තිබේ.
ඉන්දියාවේ පී යූ චිත්‍රා ක්‍රීඩිකාව රන් පදක්කම දිනා ගැනීමට සමත් වූවාය.
චම්පිකා දුල්ක්ෂීට මෙහිදී හිමිවූයේ සිව්වැනි ස්ථානයයි.
මේ අතර, දුර පැනීමේ පිරිමි ඉසව්වේ දී ප්‍රසාද් විමලසිරි රිදී ලෝකඩ පදක්කම දිනාගැනීමට සමත්ව ඇත.
මීටර් 7.82 ක දක්ෂතාව ඔහු වාර්තා කර ඇති හොඳම දක්ෂතාව ද වේ. මීට පෙර ප්‍රසාද් සුලං මාපක නොමැති අවස්ථාවක දී මීටර් 8 සීමාව ද පසු කිරීමට සමත්ව තිබේ.
එම ඉසව්වට සහභාගීවූ ධනුක ලියනපතිරණ මීටර් 7.62 ක දක්ෂතාවක් සමගින් පස්වැනි ස්ථානයට පත්වූ අතර, අමිල ජයසිරිට (7.22) අවසන් ක්‍රීඩකයන් හය දෙනා අතරට හෝ ඇතුළත් වීමේ අවස්ථාව හිමි නොවීය.
