යකඩ මිනිසා අජිත් හෙට ඉන්දියාවේ තරග බිමේ
දස ප්‍රයාමෙන් ශ්‍රී ලංකා වාර්තාව හිමි අජිත් කරුණාතිලක හෙට (15) ඉන්දියාවේ පටියාලා හී දී ආරම්භ වන ෆෙඩරේෂන් කුසලාන මලල ක්‍රීඩා ශූරතාවලියට සහභාගී වීමට නියමිතයි.
දස ප්‍රයාම ලකුණු 7000 සීමාව පසු කළ පළමු ක්‍රීඩකයාවෙමින් අජිත් මේවනවිට, ශ්‍රී ලංකා වාර්තාවට හිමිකම් කියන්නේ ලකුණු 7356 ක් සමගිනි.
එළඹෙන ආසියානු ශූරතා මලල ක්‍රීඩා තරගාවලියට අජිත්ට සුදුසුකම් ලැබීමට නම් ඉහත තරගාවලියේ දී සිය උපරිම දක්ෂතා ප්‍රදර්ශනය කිරීමට සිදු වේ.
මෙරට දී පැවති පළමු තේරීම් තරගාවලියට හා ඉදිරියේ දී පැවැත්වෙන දෙවැනි තේරීම් තරගාවලියට ද දසප්‍රයාම ක්‍රීඩාව ඇතුළත් නොකිරිම හේතුවෙන්, අජිත් කරුණාතිලකට ඉන්දියාවේ දී පැවැත්වෙන තරගාවලියට සහභාගී වීමේ අවස්ථාව උදා කර දී තිබේ.
ඔහු හෙට තම තරග ඉසව් සඳහා සහභාගී වීමට නියමිතය.
