මලල ක්‍රීඩාවේ තරු කලඑළි බසී
වසරක නිහැඬියාවෙන් පසුව ජාතික තලයේ මලල ක්‍රීඩක ක්‍රීඩිකාවන් වෙනුවෙන් ජාතික ශූරතාවලිය අද ආරම්භ විය. ජවන හා පිටිය ඉසව් වසරක පසුබෑමට ලක් කල කොරෝනාවේ බලපෑම අමතක කරමින් ක්‍රීඩක ක්‍රීඩිකාවන මහත් උද්‍යේගයෙන් තරග වදිනු දැක ගත හැකි විය.
එහිදී තරගාවලි වාර්තාවක් සමගින් ජාතික ශූරිය වීමට සාරංගී සිල්වා සමත් විය. අද දැක්වූ දක්ෂතාව ඇය තම ක්‍රීඩා දිවියේ වාර්තා කල දෙවැනි හොඳම දක්ෂතාවද වේ. මේ අතර නදීෂා රාමනායක මීටර් 200 කාන්තා ශූරිය වූයේ එම ඉසව්වේ පුද්ගලික හොඳම කාලයද වාර්තා කරමිනි.
වසර දෙකක පමණ කාලයක් ක්‍රීඩා පිටියෙන් ඉවත්ව සිටි කාලිංග කුමාරගේ මීටර් 200 ඉසව්ව තත්පර 20.79 ක කාලයකින් අවසන් කළද සුළගේ සහාය +2.4 වීම හේතුවෙන් වාර්තා අතරට එක් නොවීය. කාලිංග 2018 වසරේ දී තහනම් උත්තේජක ලබා ගත් බවට චෝදනා ලැබූ අතර පසුව තරග කිරීමේ අවස්ථාව හිමිවිය.
මේ අතර, කලක සිට මීටර් 5000 හා මීටර් 3000 ජාතික ශූරයා වන සුරංග (RMS) පුශ්පකුමාර හෙටින් පසුව ඔහුගේ සුපුරුදු ඉසව් සඳහා සමුදෙන බව ප්‍රකාශ කරයි.
අනතුරුව මීටර් 10000 හා මැරතන් ඉසව් සඳහා යොමුවන බවත්, යුද්ධ හමුදාවෙන් විශ්‍රාම යාමට පෙර සම්පූර්ණ මැරතන් තරගයකට සහභාගී විය යුතු බවත් එහිදී පැවසුවේය. මේ අතර, හෙල්ල විසිකිරීමේ පිරිමි ඉසව්වේ ශූරයා වීමට නැවතත් සුමේධ රණසිංහ සමත් වූ අතර, දුර පැනීමේ ශූරයා වූයේ ශ්‍රේෂන් ධනංජයයි. පසුගිය වසසරේ ලෝක මලල ක්‍රීඩා තරගාවලියේ බාධක දිවීමේ ඉසව්වට සහභාගී වීමෙන් පසුව පළමුවරට බාධක දිවීමේ ඉසව්වට වසරකට අධික කාලයකින් පසුව සහභාගී වූ නිලානී රත්නායක නැවත මීටර් 3000 එම ඉසව්වේ ශූරිය වූවාය. සමිත් ප්‍රනාන්දු යගුලිය විසිකිරීමේ පිරිමි ඉසව්වේ රන් පදක්කම දිනා ගැනෟමට සමත් විය.
