ආසියානු යොවුන් ශූරතාවට දොළහක කණ්ඩායමක්

• ක්‍රීඩකයන් 6ක් හා ක්‍රීඩිකාවන් 6 ක්.

• තරගාවලිය මාර්තු 15 සිට 17 දක්වා

• කණ්ඩායමට ඇමති නිර්දේශය බලාපොරොත්තු වෙනවා.

• අමතර පස්දෙනාගේ වියදම දැරිය යුතුයි

හොංකොං හී දී මාර්තු මස 15 සිට 17 වැනිදා දක්වා පැවැත්වෙන ආසියානු යොවුන් මලල ක්‍රීඩා ශූරතාවලියට ක්‍රීඩක ක්‍රීඩිකාවන් 12 ක ගෙන් යුතු කණ්ඩායමක් නම් කිරීමට ශ්‍රී ලංකා මලල ක්‍රීඩා සංගමය තීරණය කර තිබේ.

පසුගිය 19 වැනි දා පැවැත්වූ සුදුසුකම් ලබා ගැනීමේ තරගාවලියේ දී දැක්වූ දක්ෂතා පදනම් කරගනිමින් මෙම තේරීම් කටයුතු කර ඇති අතර, එහිදී පදක්කම් දිනා ගැනීමේ වැඩි අවස්ථා සහිත ඉසව් කෙරෙහි වැඩි අවධානයක් යොමුකර ඇත.

එක්දිනක් තුළ පැවැති තේරීම් තරගාවලියේ දී යොවුන් ක්‍රීඩක ක්‍රීඩිකාවන්ට වෙහෙසකර කාලසටහනක් යටතේ ක්‍රීඩා කිරීමට සිදුවුව ද, ඔවුන්ගෙන් ඉතා ඉහළ දක්ෂතා දැක ගත හැකි විය.

ඒ අනුව ඉන් බොහෝ පිරිසකට, ඉහත සඳහන් 12 දෙනා අතරට පිවිසීමට අවස්ථාව හිමි ව ඇත.

කෙසේ වෙතත්, මේ කණ්ඩායම සහභාගී කරවීම සම්බන්ධයෙන් ගැටලු කාරී තත්ත්වයක් ද මතුව තිබේ.

ආසියානු යොවුන් මලල ක්‍රීඩා ශූරතාවලියේ තරග සංවිධායකයන් ශ්‍රී ලංකාවට සහභාගී කරවිය හැකි ක්‍රීඩක ක්‍රීඩිකාවන් සංඛ්‍යාව හතක් වීම හේතුවෙන්, ඉතිරි පස්දෙනා වෙනුවට අමතර පිරිවැයක් දැරීමට සිදුවේ.

එම මුදල ගුවන් ප්‍රවේශ පතට අමතරව එක් ක්‍රීඩකයෙකුට ඇමරිකානු ඩොලර් 200 බැගින් වූ මුදලකි.

මේ සඳහා ක්‍රීඩා අමාත්‍යංශයෙන් මූල්‍ය ප්‍රතිපාදන ලබා දුන හොත් පමණක් සම්පූර්ණ කණ්ඩායම ඉහත තරගාවලියට සහභාගී කරවන තත්ත්වක් ඇති විය හැක.

ආසියානු යොවුන් මලල ක්‍රීඩා ශූරතාවලි ඉතිහාසයේ පැවැති තරගාවලි දෙකේ දී, රන් පදක්කමක්, රිදී පදක්කම් හතරක් හා එක් ලෝකඩ පදක්කමක් දිනා තිබේ.

මෙරට මලල ක්‍රීඩාවේ අනාගතය වන මේ වයස අවුරුදු 18 ට අඩු වයස් කාණ්ඩයේ පසුවන මේ ක්‍රීඩක ක්‍රීඩිකාවන්, රැක ගැනීමට හා ක්‍රීඩාව කෙරෙහි ඇති උනන්දුව වැඩි කිරීමට මෙවැනි අවස්ථා ලබා දීම සිදුකළ යුතුවේ.

පහත සඳහන් කරන කණ්ඩායම මේ සඳහා සුදුසුකම් ලබා ඇති අතර, මෙම කණ්ඩායම ක්‍රීඩා අමාත්‍යංශයේ නිර්දේශය සඳහා යොමු කර තිබේ.